qul QemjIq retlhDaq ba’ molwI’ be’nal ‘ej paSlogh tI’.
retlhDajDaq ravDaq Qong buDbogh vIghro‘Daj qIj.
juHchajDaq paw loDnalDaj ‘e’ loS be’.

loS molwI’ be’nal buDbogh vIghro‘ qIj ‘ej loS chaH.
tagha’ nom juHDaq qet molwI’.
‘Iw Hutlhlaw’ molwI’ qab ‘ej poSqu’ mInDu’Daj.

<taQ qablIj!> jatlh be’nalDaj.
jatlh <qaSpu’ nuq?>

tlhoS jatlhlaHbe’ molwI’.
ghaH bejchoHchu’ molwI’ be’nal.
ghaH bejchoHchu’ je buDbogh vIghro‘ qIj.

<vorD HoD mol vItebHa’taHvIS jIvemHa’pu’> jatlh molwI’.
<<mIy’aw> jatlhpu’ vIghro‘ ‘e’ vIQoyDI’ jIvempu’> jatlh.

<mIy’aw> jatlh be’nal buDbogh vIghro‘ qIj.

poSchoHchu’ molwI’ mInDu’.
vIghro‘Daq SIq.

<HIja’! ‘e’ rurpu’!> jatlh molwI’.
<mol jaQ bIS’ubDaq jIHpu’. mol yorvo’ jIbejpu’> jatlh molwI’.
<lom ‘aplo’ luqengbogh Hut vIghro‘ qIj’e’ vIleghpu’> jatlh molwI’.

<lom ‘aplo’> jatlh be’nalDaj. pe’vIl pur.

<lom ‘aplo’ vel tlhIm qIj> jatlh molwI’.

<cholpu’ vIghro‘ ‘ej cholpu’ vIghro‘> jatlh molwI’.
<<mIy’aw> jatlh vIghro‘> jatlh molwI’.

<mIy’aw> jatlh be’nal buDbogh vIghro‘ qIj.

<HIja’! ‘e’ rurpu’!> jatlh molwI’.
<wovqu’ mInDu’chaj. Hovmey machqu’ rur. mInDu’wIj bej> jatlh molwI’
<‘ej DaH rur vIghro‘lIj. mInDu’wIj bej> jatlh molwI’.
DoH ‘ej loQ joq molwI’.

<vIghro‘wIj yIbopQo’!> jatlh be’nal.
<ghIq qaS nuq?> jatlh be’nal.

<cholpu’ lom ‘aplo’ tlhopDaq Qambogh vIghro”e’> jatlh molwI’.
<tagha’ Hotchuq ghIchmaj> jatlh molwI’.

<ghIq qaS nuq?> jatlh be’nal.

<mujatlhpu’ vIghro‘!> jatlh molwI’.
<<Heghpu’ tIm qan. tom qan yIja’!> jatlhpu’ vIghro‘> jatlh molwI’.

ghIq qamDu’Daq Sup be’nal buDbogh vIghro‘ qIj.
jach molwI’ be’nal.
DeSDu’Daj pep buDbogh vIghro‘ qIj.
Sach ‘ej wochchoH ‘ej Sach ‘ej wochqu’choH.
tugh wej vIghro‘mey ‘ab.

tagha’ jatlh buDbogh vIghro‘ qIj.
<tIm qan Heghpu’, qar’a’? toH! tom qan jIH, ‘ej DaH vIghro‘ voDleH jIH!> jatlh buDbogh vIghro‘ qIj.

ghIq pay’ qul QemjIq tlhIch ‘och vegh.
not buDbogh vIghro‘ qIj leghqa’ molwI’ be’nalDaj je.

‪#‎nanoklingmo‬